?

Horrek mindu, iraindu eta egoera larrian utzi gaitu Nafarroako euskarazko hedabideak, era guztietako kalte zuzenak eta zeharkakoak ere eraginez. Dagoeneko estu-estu dugun gerrikoa are gehiago estutu beharko dugu gutako askok, eta ez litzateke harritzekoa datozen hileotan baten batek Ttipi-Ttapa Telebistaren bide beretik jarraitu behar izatea, gaudenean ez baita erraza finantzazio bide alternatiboak bilatzea, saiatzen ari garen arren. Diru-laguntzen afera porrot gisa aurkeztu du Euskarabideako zuzendarikudeatzaile Xabier Azanza jaunak, urte osoa eman baitu laguntza etorriko zela publikoki zein pribatuan errepikatzen. Hala ere, karguan segitzeko asmoa duela azaldu du argi eta garbi.

?

Gauzak horrela, eskaera zuzena egin behar diogu: ez dadila kudeatzaile figuraren atzean ezkutatu, ematen diotena banatzera mugatuz, eta zuzendari gisa jokatu dezala: erabakiak hartuz, proposamenak eginez, behar duena Gobernuari exijituz, eta porrot hori gainditzeko urratsak emanez. Hari ez beste inori dagokio egoera bere onera ekartzea. Horretarako, ekimena hartu behar du, eta, gutxienez, ondoko hauek argitu:

?

• Lehenik eta behin 2010eko diru-laguntza deialdia lehenbailehen argitaratu dezala.
• Azken bileretan adierazi dizkigun 'oztopo legalak' baino, jar dezala behingoz mahai gainean lege zein ekonomia aldetik zeintzuk bide jorratuko dituen zehazki (akordia, hitzarmenak) hedabideen egoera egonkortzeko, Parlamentuaren eskaerari erantzunez.
• Aztertu eta zehatz dezala zein den euskararen erabilera duintasunez eta eraginkortasunez sustatzeko beharrezko gutxieneko diru-kopurua, horren berri eman dezala jendaurrean, eta beharrezko duen hori eska diezaiola Gobernuari eta baita Parlamentuari ere.

Bere postutik gauza asko egin daitezkeela esan du Xabier Azanzak porrotak gorabehera bertan geratzea azaltzeko, eta orain du aukera hala dela erakusteko. Horren zain gaude eta, beti bezala, ahal dugun heinean laguntzeko prest.

?

Bestalde, Nafarroako Parlamentuaren Hezkuntza Batzordeari ere zuzendu nahi gatzaizkio: Batzorde horrek aho batez onartu zuen eskaria egitea gobernuari euskarazko hedabideen egoera egonkortzeko hitzarmenak lantzeko, eta eskariaren jarraipena egiteko. Gertatutako guztia kontuan hartuta, uste dugu Parlamentuari ere badagokiola esku hartzea Gobernuak hedabideok jarri gaituen ataka honetatik ateratzeko.

?

Nafarroako Gobernuari ere, hainbat aldiz errepikatu dugun bezala, eskatu nahi diogu aitzakiak alde batera utzita legeak agintzen diona bete eta bere ondarea ere badiren euskara eta euskal kultura, zein nafar euskaldunoi merezi dugun errespetua erakuts diezagula.

?

Azkenik, eta orain arte egin dugun bezala, eragile horiei guztiei argi adierazi nahi diegu prest gaudela egoera hau onera ekartzeko behar duten laguntza guztia emateko.

?

Topagunea Euskara Elkarteen Federazioa

Nafarroako euskal hedabideak

Nafarpress

TOPAGUNEAn federatutako tokiko hedabideek TOKIKOM aurkeztu dute gaur, tokiko hedabideen marka bateratua. TOKIKOMek tokiko hedabideen sektoreak duen indarra azpimarratzea eta barne kohesioa areagotzea du helburu nagusitzat. Arduraduek azaldu dutenez: Dauden leku guztietan, tokiko aldizkariak liderrak dira hedabideen alorrean. Baina hala ere, txikiak direlako pertzeptzioa gailendu egiten da gehienetan. Tokikotasuna tamaina txikiarekin lotzen da sarritan, batez ere, iragarle handien eta bestelako eragile publiko eta pribatuen aldetik, eta ez dugun irismen handiarekin, edo irakurleen atxikimenduarekin. Hori ekiditeko, TOKIKOM sortzea erabaki dugu, tokiko aldizkarien talde izaera azpimarratzera datorren marka bateratua.

Baina TOKIKOM ez da asmo deklarazio hutsa, eta bere lehen fruitua gaur aurkeztutako www.tokikom.com tokiko aldizkarien agregatzailea da

Tokikom.com webgune berriak TOKIKOMeko aldizkarien edizio digitaletako titularrak jaso eta batera aurkezten ditu automatikoki, Euskal Herriko tokiko errealitatearen orainkari moduko bat eratuz. Titular batean klik eginez gero, jatorrizko webgunera eramango gaitu, informazio osoa lehen eskutik jaso dezagun.

Horrez gain, eskualdekako aukeraketa ere egin dezakegu, leku jakin bateko albisteak irakurri edo bertako aldizkaria zein den jakin nahi izanez gero. Webgunea gure eskaparatea ere bada nolabait, eta bertan aurki daiteke hala TOKIKOMen beraren nola aldizkari bakoitzaren inguruko informazio zehatza, kontaktatzeko modua eta abar.

Hedabideen ordezkariak balorazioaren berri ematen NABARRERIAko lokaletan

 

Nabarreriako Mikel Buldainek, Nafarroako Topaguneako Oskar Zapatak eta Bierrik Fundazioko Garbiñe Petriatik ondoko idatzi hau aurkeztu dute Iruñean, Nafarroako euskarazko hedabideen izenean, Nafarroako Gobernuak diru-laguntzarik ez emateko erabakiaren urgentziazko balorazioa eginez:

Euskarabideako zuzendari-kudeatzaile Xabier Azanzak atzo jakinarazi zuenez, Nafarroako euskarazko hedabideok zentimo bakar bat ere ez dugu jasoko, Nafarroako Gobernuak diru laguntza deialdia ez egitea erabaki duelako.

Arrazoia? Horretarako zegoen diru kopurua (240.000 euro) Hezkuntza Departamentuak Ikastetxe edo haurtzaindegiren batean... obrak egiteko behar omen ditu eta hori lehenetsiko dute.

Arrazoi horri aitzakia usaina dario nonahitik begiratuta ere. Gure ustez, hau guztia ez da erabaki teknikoa, erabaki guztiz politikoa baizik, xede garbia duena: Euskal Komunikabideak gutxiestea, euren langileak eta ordezkariak mespretxatuz, Nafarroako euskal komunitatea beste behin ere iraintzea bilatzen duena, bide batez legez ezarrita duten betebeharrari muzin eginez.

Ezerezean geratu da, beraz, Euskarabideak eta Hezkuntza Departamenduak urte osoan zehar, eta uztailean bereziki, emandako hitza. Deusetarako ez du balio urte osoan zehar aurtengo egoera konpontzeko inbertitu ditugun ordu eta ahalegin guztiak.

Dudarik gabe behin erabakia finkoa dela dakigula, gure esku dagoen guztia egingo dugu Nafarroako Gobernuaren gainetiko instantziek honen berri jaso dezaten.

Hori horrela, dei zuzena egiten diegu PSN, NABAI, EB, CDN eta nola ez UPNri ere datorren urterako aurrekontuetan euskarazko hedabideok aurten jasan dugun kolpe latz hau neurri batean behintzat konpentsatu eta aurrekontuan ezarritako 250.000 euroko partidaz gain, aurtengo uztailean hitz emandako beste 240.000ak gorde ditzatela helburu horretarako.

Azkenik, eta inoren borondate eta asmo pertsonalak zalantzatan jarri gabe, dei zuzena egin nahi diegu hala Euskarabideako zuzendariari nola bere zuzendaritza taldeari hausnarketa sakona egin dezaten jokatzen ari diren paperaz eta horren baitan erabaki dezaten aurrerantzean nola jokatu. Borondateak borondate, Euskarabidea ere Nafarroako Gobernuaren parte da, eta egoera honen erantzukizuna hari dagokio zati handi batean. Horretaz hausnartzeko eta koherentziaz jokatzeko eskatu nahi diegu guztiei.

Gertatu dena gertatu dela ere, euskarazko hedabideen egoera egonkortzeko Nafarroako Gobernuarekin elkarlanean aritzeko prestutasuna izaten jarraitzen dugu. Beste aukerarik ez dugu: finean, horixe da gure helburua, eta Gobernuaren legezko zeregina.